16 July 2020 – Maydka Ra’iisul wasaarihii hore ee dalka oo Muqdisho laga soo dejiyay

16 July 2020

Ra’iisul wasaarihii hore ee dalka ayaa 12-kii Bishan ku geeriyooday magaalada Ankara ee dalka Turkiga, waxaana maanta lagu aasi doono magaalada garoowe.

Muqdisho, Soomaaliya – Diyaaraddii sidday maydka Ra’iisul wasaarihii hore ee dowladdii KMG aheyd Allaha ha u naxariistee Xasan Abshir Faarax ayaa saakay soo caga dhigatay garoonka diyaaradaha Aadan Cadde ee Muqdisho, waxaana salaadda Janaasada ku tukaday qaar ka tirsan madaxda dowladda Soomaaliya oo uu ku jira Farmaajo.

Waxaana la filayaa in maydka lagu aaso magaaladda Garoowe, iyadoo halkaasi ay ku sugan yihiin Ra’iisul Wasaare Kheyre oo saakay tagey iyo madaxda Maamul Goboleedyada dalka, oo kala ah Jubaland, HirShabeelle, Koonfur Galbeed, Galmudug iyo Puntland.

Dhinaca kale, Wariyeyaasha Muqdisho oo saaka ka qeyb geli lahaa tebinta wararka la xiriiro maydka R/wasaare Xasan Abshir Faarax ayaa loo diiday in ay galaan gudaha garoonka Aadan Cadde, ilaa hadana lama oga sababt loogu diiday, balse dowladda haatan jirta ayaa ah mid ku tumaneysa xorriyadda Saxaadda.

===============

Ra’iisul Wasaare Kheyre oo safar deg deg ah ku tegaya Garoowe

15 July 2020

Safarkaan Ra’iisul wasaare Kheyre iyo madaxda maamul goboleedyada ayaa u jeedkiisu yahay ka qeyb galka duugta Ra’iisul wasiirihii hore ee dalka iyo madaxweynihii hore ee Maamulka Puntland.

Muqdisho, Soomaaliya – Ra’iisul wasaaraha Soomaaliya Xasan Cali Kheyre iyo madaxda Dowlad Goboleedyada oo haatan kuwada sugan magaalada Dhuusamareeb, ee caasimadda Galmudug ayaa la filayaa in ay u safraan Garoowe.

Ujeedka safarka ayaa ah ka qeyb galka aaska Ra’iisul wasaarihii hore ee Soomaaliya Xasan Abshir Faarax iyo Madaxweynihii hore ee Puntland Maxamed Cabdi Xaashi oo maalmo kahor ku kala geeriyoodey Kenya iyo Turkey.

Meydka Madaxweynihii hore ee Puntalnd Maxamed Cabi Xaashi marna madaxweyne ku xigeen soo noqday ayaa saaka diyaarad ka soo qaaday magaalada Nairobi ee dalka, halkaas uu 12-ka bishaan ku dhintay, kadib markii uu xanuunsaday.

Dhinaca kale, Meydka Ra’iisul wasaarihii hore ee dowladdii kMG aheyd Xasan Abshir Faarax ayaa isna lagu wadaa in lagu aaso Magaalada Garoowe.

Madaxweynaha Puntaland Saciid Cabdullaahi Deni iyo wafdi uu hoggaaminayo ayaa shalay galab ka amba baxay Dhuusamareeb, isagoo dib ugu laabtay Garoowe si uu uga qeyb galo aaska Marxuum Gen Xasan Abshir iyo Maxamed Cabdi Xaashi.